Нема да ти биде лесно со мене наредната сезона

Шпанскиот тенисер Карлос Алкараз му се „закани“ на Италијанецот Јаник Синер, да се подготви за следната сезона, по поразот на завршниот АТП-мастерс во Торино. Алкараз прво му честиташе на големиот ривал, а потоа му порача дека следната година нема да му биде лесно во дуелите против него, надевајќи се на нови мега дерби- пресметки меѓу нив.

– Ова беше одлична година за тебе, сега е време за одмор и се надевам дека ќе имаш време да се одмориш и да се подготвиш за следната сезона, бидејќи јас ќе бидам подготвен. Знам дека ќе има уште одлични натпревари меѓу нас, нема да ти биде лесно со мене – изјави Алкараз.

Синер успеа да го совлада Алкараз во финалето во Торино со 2:0 во сетови. Во финалето, кое траеше повеќе од два часа, Синер го контролираше ритамот и во најкритичните моменти покажа мирнотија и прецизност, кои му ја обележуваат сезоната. По драматичниот прв сет решен во тај-брејк, Италијанецот успеа да го задржи високото ниво и во вториот дел од мечот, приврши со 7:6 и 7:5.

Со овој успех, Синер ја продолжи својата неверојатна серија победи во сала. На тврда подлога, сезонава е практично неприкосновен, а неговата победничка низа стигна до импресивни 31 натпревар последователно. Единствен што успеа да го совлада во слични услови во последните повеќе од 40 дуели е Новак Ѓоковиќ, и тоа токму во финалето на тој турнир, во 2023 година.

Со оваа титула, Италијанецот ја зацврсти својата позиција на светската ранг-листа, иако ја завршува годината како втор тенисер во светот. Разликата со Алкараз е значително намалена и сега изнесува само 550 бода, што навестува уште поинтензивна борба за врвот во наредната сезона.

Трофејот во Торино е шести за Синер во тековната сезона и 24. во неговата кариера, што го става меѓу најуспешните активни тенисери.