Неколку европски поштенски служби ќе престанат да испраќаат пакети во Соединетите Американски Држави почнувајќи од денес

Неколку поштенски служби низ Европа денес објавија дека престануваат да испраќаат пакети во Соединетите Американски Држави поради нејасни правила во врска со новите увозни тарифи.

Поштенските служби во Германија, Данска, Шведска и Италија соопштија дека засега ќе престанат да испраќаат повеќето стоки во Соединетите Американски Држави, а Франција и Австрија ќе го следат примерот во понеделник, а Обединетото Кралство во вторник, објавува „АП“.

Според извршната наредба потпишана минатиот месец од претседателот Доналд Трамп, меѓународните стоки претходно ослободени од американските тарифи под 800 долари ќе подлежат на увозни давачки почнувајќи од 29 август, додека писмата, книгите, подароците и малите пакети под 100 долари ќе останат ослободени.

Трговската рамка договорена меѓу Соединетите Американски Држави и Европската Унија минатиот месец воведе царина од 15 проценти за повеќето производи испратени од ЕУ.

Многу европски поштенски служби објавија дека ги паузираат испораките бидејќи не можат да гарантираат дека стоките ќе пристигнат во САД пред 29 август, наведувајќи ја неизвесноста околу тоа кои стоки се опфатени со новите правила и недостатокот на време за обработка на нивните целосни импликации, потсетувајќи дека испораката преку услуги како што е „ДХЛ Експрес“ (DHL Express) е сè уште можна.

PostEurop, здружение на 51 европски јавни поштенски оператори, изјави дека доколку не се најде решение до 29 август, сите членови на здружението веројатно ќе го следат примерот.