Група од 17 земји, вклучувајќи ги Саудиска Арабија, Катар и Египет, го повикаа Хамас да го предаде своето оружје на Палестинската самоуправа во понеделник, за време на конференцијата на ОН, чија цел беше оживување на решението за две држави за Израел и Палестина, објави „АФП“.
Таканаречената „Њујоршка декларација“, подготвена од Франција и Саудиска Арабија, копретседатели на конференцијата на ОН, и поддржана од 15 други земји, вклучувајќи ги Бразил, Канада, Турција, Јордан, Катар, Египет и Обединетото Кралство, како и Европската Унија и Арапската лига, повикува на крај на војната во Појасот Газа и на „праведно, мирно и трајно решение за израелско-палестинскиот конфликт врз основа на спроведувањето на решението за две држави“.
Земјите наведуваат дека „управувањето, спроведувањето на законот и безбедноста на сите палестински територии мора да бидат единствена одговорност на Палестинската самоуправа, со соодветна поддршка“.
„Хамас треба да ја прекине контролата врз Газа и да го предаде оружјето на Палестинската самоуправа“, се додава во декларацијата.
Текстот повикува на непречен пристап до хуманитарна помош во Газа и ја отфрла „употребата на глад како метод на војување“.
Земјите додадоа дека го поддржуваат распоредувањето на привремена меѓународна стабилизациска мисија во Газа.
Мисијата би имала за цел да го заштити цивилното население, „да го поддржи префрлањето на безбедносните одговорности“ на Палестинската самоуправа и да обезбеди „безбедносни гаранции за Палестина и Израел, вклучително и следење“ на спроведувањето на идниот прекин на огнот, објави „Бета“.
