Не е злато, ама цената на бакарот руши рекорди

Деновиве, светскиот пазар на бакар бележи нов историски рекорд. Цената на овој метал, клучен за енергијата, електрониката и инфраструктурата, достигна околу 11.500 долари за тон, што ги надмина сите претходно регистрирани вредности.

Ваквиот раст е резултат на невообичаено силна комбинација од фактори – од прекини во глобалната понуда до исклучително висока побарувачка поттикната од новите инвестициски циклуси во технолошкиот и енергетскиот сектор.

Цената на бакарот во референтните тримесечни фјучерси договори на Лондонската берза (LME ) изнесуваше 11.487,5 американски долари за тон, надминувајќи го рекордот поставен само два дена претходно од 11.252 долари за тон.

Скокот беше предизвикан од бран нарачки од Јужна Кореја и Тајван, што доведе до најголем пораст на барањата за повлекување на залихите на бакар од магацините на берзата. Вкупните залихи на бакар во системот за складирање на Лондонската берза сега изнесуваат 162.500 тони.

Од почетокот на годината, цената на бакарот се зголеми за околу 30%, со акцент на раст во втората половина од годината. Скокот беше поттикнат од проблеми со снабдувањето од клучните земји производители и шпекулации за можни американски царини.

Во јули, американскиот претседател Доналд Трамп објави царини од 50 проценти за увоз на бакарни производи, што предизвика остар пад на цените во САД и влијаеше на светските пазари. Вашингтон подоцна ги повлече објавените царини, но трговците сè уште трупаат залихи во САД, што дополнително ги зголеми цените на берзата Comex во Њујорк.

Порастот на цените беше дополнително поттикнат од несреќи во неколку од светските рудници за бакар.

Според октомвриската проценка на консултантската компанија BMI, побарувачката за бакар во 2026 година ќе ја надмине понудата за повеќе од 400.000 тони, додека претходно очекуваа недостиг од само 72.000 тони.

Стравувањата се дополнително зајакнати со најавите за намалување на производството од страна на големите рударски компании.

Канадската компанија Ivanhoe Mines ја намали својата прогноза за производство во комплексот Камоа-Какула во Демократска Република Конго поради поплави.

Швајцарската компанија Glencore, чие производство се намали за 40% од 2018 година, исто така ги намали своите прогнози за следната година.

И покрај моменталните флуктуации, аналитичарите проценуваат дека високата цена на бакарот би можела да остане присутна долго време, бидејќи глобалната побарувачка за овој метал е веројатно само на почетокот на долгорочен тренд на раст.