Мемоарите на Вирџинија Џуфре, една од најпознатите обвинителки на сексуалниот престапник Џефри Епштајн, ќе бидат објавени постхумно на 21 октомври, шест месеци по нејзиното самоубиство во април, објави „Пенгуин Рендом Хаус“.
Соопштението доаѓа во време кога администрацијата на Доналд Трамп, кој беше близок со Епштајн до средината на 2000-тите, се обидува да ги запре критиките за недостаток на транспарентност во случајот со богатиот човек кој беше пронајден обесен во затвор во Њујорк во 2019 година, пред да започне неговото судење за сексуални злосторства.
Вирџинија Џуфре беше водечки глас за жртвите на Епштајн пред да изврши самоубиство во Австралија во април на 41-годишна возраст. Таа го обвини Епштајн дека ја користел како „сексуален роб“ на почетокот на 2000-тите, кога имала 16 години.
Според Џуфре, нејзината средба со Гислен Максвел, партнерка и соучесничка на Епштајн, се случила во јуни 2000 година на имотот на Трамп во Мар-а-Лаго.
Џуфре работеше на „Ничија девојка: Мемоари за преживување на злоупотреба и борба за правда“ со наградуваната авторка и новинарка Ејми Волас пред нејзината смрт претходно оваа година.
Таа тврдеше дека била жртва на трговија со луѓе за сексуални услуги и дека била принудена да има сексуални односи со принцот Ендру, братот на кралот Чарлс III, и го заврши ракописот пред нејзиното самоубиство во април.
Принцот Ендру ги негираше нејзините обвинувања, а во 2022 година Џуфре и принцот постигнаа вонсудска спогодба откако таа го тужеше за сексуален напад.
Џуфре му напишала писмо на Волас 25 дена пред нејзината смрт, наведувајќи дека нејзина „искрена желба“ е мемоарите да бидат објавени „без оглед“ на околностите.
„Во случај на моја смрт, сакам да се осигурам дека „Ничија девојка“ ќе биде објавена. Верувам дека има потенцијал да влијае на многу животи и да предизвика многу потребни дискусии за овие тешки неправди“, напишала таа во писмото.
Гислејн Максвел беше осудена на 20 години затвор во 2020 година за подведување млади девојки, од кои многу биле малолетни, помеѓу 1994 и 2004 година, за Епштајн да може сексуално да ги експлоатира.
Во петок, Министерството за правда на САД ја објави содржината на неодамнешното интервју со Гислејн Максвел, во кое соучесничката на Епштајн рече дека „никогаш“ не забележала никакво несоодветно однесување од Доналд Трамп.
