Нашата водителка Лила Стојановска бара Македонија да се врати на Песна на Евровизија 2026

Со петиција од нејзината родна Шведска! Се уште згодната македонска и долги години една од најпопуларните водителки Лила Стојановска (екс-Филиповска) јавно бара Македонија да и се врати на Песна на Евровизија. Таа пред ден, два емотивно сподели објава во која вели: – Од мојата родна Шведска (за тие што не знаат, Лила е родена во градот Гетеборг), започната е петиција (меѓу нашите иселеници), за враќање на Македонија на Евровизија 2026. Ако сте фан на Евровизија потпишете ја петицијава за враќањето на македонските композитори и автори на големата музичка сцена на Евровизија 2026 во Виена, на јубилејното 70-то издание.

Евровизискиот фестивал ќе се одржи во мај месец во Австрија, од како таа земја победи оваа година со Австриецот Џеј-Џеј. Тој маестрално ја испеа оперската балада „Wasted Love“.Дали Лила ќе успее со оваа необична акција, останува да видиме.  А и прашањето е зошто е Лила толку заинтересирана Македонија да се врати на Евровизискиот фестивал? Таа ниту ќе пее таму, ниту ќе го води овој популарен музички спектакл. Освен ако не e од чисто патриотски причини или ако и самата е голем фан на Евросонгот?

Инаку, под нејзината објава има и разновидни коментари. Во еден од нив, меѓу другото, се вели: – Сега има и онаа друга која се вика “Интервизија” и на која навистина пред некој ден видовме и слушнавме и песни и пеење и пејачи. Се одржа во Москва и нема никва врска со омразата кон Западните земји кои ја исфрлија Русија од нивната Eвровизија, а вметнувајќи ја Австралија, што е парадокс!  На Македонија никој ни и забранува да настапи и на Интервизија а, за Западњачка Евровизија поодамна се мошне длабоко поделени мислењата и ставовите.

И ако се вика Песна, таму песна не се избира, туку најчесто невкусни и скандалозни сценски настапи…. Евровизија беше фестивал тогаш кога во конкуренцијата за најдобрата Песна се натпреваруваа или победуваа вистинските: АББА, Селин Дион, Џони Логан, Тото Кутуњо, Џиљола Чинквети, Данијел, Марија Шерифовиќ, Хулио Инглесијас, Вики Леандрос, Доменико Модуњо, Руслана, Тоше Проески и многу други….   (Д.М.)