На Меѓународниот саем за туризам во Нови Сад на кој Македонија е земја партнер, нашиот туристички потенцијал доби централно место, со посебно уреден простор и со програма што ја истакнува земјата како водечка дестинација. На саемот ќе има повеќе од 250 излагачи, освен од нашата држава, и од Црна Гора, Романија, Унгарија, Босна и Херцеговина, Бугарија, Грција, Словенија и од Русија. Во текот на трите дена, од 27 до 29 ноември, на саемот ќе бидат претставени повеќе агенции, организации, институции, здруженија, туроператори, хотели, бањи, винарници…. Тие ќе обезбедат информации за угостителските и за туристичките објекти, за сместувачките капацитети и настани, за руралниот туризам, за природните убавини и за туристичките дестинации.
Министерот за култура и туризам, Зоран Љутков, на македонската вечер што се организираше во рамките на саемот, им се заблагодари на организаторите, како и на сите партнери и соработници што овозможиле Македонија годинава да биде земја партнер и да ги претстави своите автентични вкусови, звуци и бои и да ја раскаже својата приказна.
– Овде сме да споделиме дел од нашето културно наследство, кое не се мери само со традиции туку и со чувството на припадност, со топлината на гостопримството и со љубовта со која е создавано тоа со векови. Туризмот навистина е мост што ги поврзува луѓето и културите, што создава пријателства, руши бариери и нè потсетува дека убавината на светот е најголема тогаш кога се споделува. А кога зборуваме за убавината, дозволете ми да ви ја доближам мојата земја. Македонија е земја со душа, земја каде што сонцето со векови ја милува истата камена калдрма во Охрид, каде што езерото го чува спокојот на древните легенди, а манастирите низ Бистрица, Плачковица и Осогово како да ја чуваат тишината на времето. Тоа е земја каде што планинските масиви се издигаат со достоинство и ја носат силата на Балканот, каде што реките ја кројат сопствената музика, а селата мирисаат на див чај, на традиција и на живот што се движи побавно, но подлабоко – истакна Љутков во своето обраќање на отворањето.
Македонија, како што рече, е мозаик од култури, религии и од приказни, земја чиј фолклор е жив, чија музика буди носталгија и чија кујна, скокоткајќи го непцето, ја топи секоја бариера меѓу непознатите луѓе.
Тој ги покани присутните да ја посетат Македонија и да ги почувствуваат мирот на езерата, свежината на планините, енергијата на градовите, топлината на народот, да ја вкусат гастрономијата, да го доживеат фолклорот и да прошетаат на места каде што историјата и природата живеат како едно. На крајот, министерот рече дека е уверен дека нема да биде доволна една посета и оти гостите ќе сакаат да се вратат повторно, затоа што Македонија не е само дестинација, таа е и доживување.
За туристичките работници, пак, фактот дека Македонија е избрана за земја партнер на еден од најголемите туристички саеми во регионот носи силна симболика, тоа е признавање на нејзиниот потенцијал како дестинација што има што да покаже на глобалната туристичка карта.
