Напад во имиграциски центар во Тексас: Едно лице загина, се сомнева на „идеолошки мотив“

Во пукотница во канцеларијата на Службата за имиграција и царина (ICE) во Далас денес загина едно лице, а други две беа ранети. Вооружениот напаѓач напишал „АНТИ-ICE“ на неискористен куршум пред да се самоубие, соопштија официјални лица.

Директорот на ФБИ, Кеш Пател, објави фотографија од она што тој го нарече потрошени чаури за кои рече дека му припаѓале на осомничениот. Тој додаде дека првичната анализа на доказите укажува на идеолошки мотив за нападот, објави Ројтерс.

На прес-конференција во Далас, официјалните лица го потврдија постоењето на чаурите, но нагласија дека истрагата е сè уште во рана фаза. Џозеф Ротрок, специјален агент на ФБИ во Далас, рече дека властите го третираат нападот како „чин на целно насилство“.

Полицијата соопшти дека вооружениот напаѓач отворил оган врз канцеларијата од блиската зграда околу 6:40 часот по локално време. Две лица биле однесени во болница со прострелни рани, додека трето лице починало на местото на настанот. Нема повредени полицајци. Нападот се случил во теренска канцеларија на ICE, а не во центар за притвор, каде што службениците на ICE спроведуваат краткорочна обработка на неодамна уапсени лица.

„Изгледаше како да е снајперист или оружје со долг дострел“, изјави за Фокс њуз Триша Меклафлин, портпаролка на Министерството за внатрешна безбедност.

Инцидентот се случува само две недели откако конзервативниот активист Чарли Кирк беше убиен од снајперист за време на настан во Орем, Јута, што предизвика загриженост за можен нов бран политичко насилство во Соединетите Американски Држави. Претседателот Доналд Трамп, потпретседателот Џ.Д. Венс и други претставници на администрацијата лажно ги обвинија либералните организации за поттикнување насилство против десницата.