Непријатна случка викендов имало во Скопската зоолошка градина поради непримерно однесување на деца – посетители кои биле качени на оградата на едно од живеалиштата.
Тогаш им приоѓа негувателот Војо Иванов, кој со видео го има документирано тоа и ги предупредува да слезат од оградата. Наместо да ги искараат и да им кажат на своите деца да не го прават тоа, родителите мирно ги поддржуваат и му се спротивставуваат на негувателот.
– Господо! Господо, долу! Долу, господо – вели Иванов, по што еден од присутните родители му возвраќа: „Полека бе, полека“. Кога негувателот укажува дека „децата ви се горе“, родителот одговара: „Ако де, што има врска? Да не се внатре?“
Дијалогот продолжува со инсистирање на Иванов дека мора да слезат од оградата, на што родителот реплицира: „Однесувај се малку покултурно“.
– Јас култура, а вие сте на ограда? – му враќа негувателот, а родителот пак возвраќа: „Ако, мое право“.
Под самото видео, Иванов напишал коментар: „Ризик јак, недела со гостите“, додека во реакциите на јавноста доминираа критики за недоличното однесување на посетителите.
Многумина истакнуваат дека стоењето на оградата е опасно и доколку некое дете падне во живеалиштето, вработените во зоолошката ќе бидат одговорни. Други велат дека кога сме во институција, на јавен простор или каде било, а не кај нас дома, треба да ги почитуваме правилата. Трети, пак, му даваат комплименти на Војо за неговата смиреност и за начинот на кој се справи со ситуацијата.
