Наместо асфалтирани, да се прават „зелени“ паркинзи 

Наместо паркинзи со асфалт, може да се направат „зелени“, како оние во Капиштец кои ја впиваат водата од поројни дождови и на нив растат тревки. Ова го предлагаат од „Шанса за Центар“, коментирајќи за новиот паркинг кој се прави зад Трговскиот центар „Буњаковец“.

– Супер е што Општина Центар од руиниран простор создава паркинг за граѓаните. Проблем е што само со асфалтирање на просторот создава топлотен остров и површина која не пропушта вода. Асфалтот е надминато решение. Секој паркинг може да придонесува и за двете. Подлогата не мора да биде направена од материјал кој не пропушта вода и акумулира топлина – сметаат од „Шанса за Центар“.

Оттаму нагласуваат дека со различна подлога на паркинзите и со садење дрвја се овозможува и паркирање и да се впива водата од дождовите, наместо да се разлева по улиците и да оди во подземните природни резервоари, и да не се создаде нов топлотен остров на кој температурата може да достигне над 60 Целзиусови степени.