Најтешката точка за време на разговорите меѓу американската, руската и украинската делегација во Абу Даби во петокот и денес беше територијалното прашање, а меѓу другото, беше разговарано и за создавање тампон зона, објавува рускиот портал Фонтанка.
Руските медиуми јавуваат дека првата средба, која се одржа вчера, траела околу четири часа, додека втората средба, која се одржа денес и исто така беше затворена за јавноста, траела околу три и пол часа.
Според изјавите на украинските претставници, објавени од Аксиос, за време на разговорите во Абу Даби, американските медијатори одржале заеднички состанок со руските и украинските преговарачи, а Русите и Украинците потоа се сретнале директно без присуство на Американците.
Преговорните тимови се сретнаа и со претседателот на Обединетите Арапски Емирати, шеикот Мохамед бин Зајед, кој беше домаќин на разговорите.
Министерството за надворешни работи на ОАЕ во соопштението соопшти дека разговорите се фокусирале на отворените прашања во мировниот план на САД за завршување на војната во Украина.
„Разговорите се одржаа во конструктивна и позитивна атмосфера и вклучуваа директна интеракција меѓу руските и украинските претставници за преостанатите прашања од мировниот договор предложен од САД, како и мерки за градење доверба насочени кон олеснување на напредокот кон сеопфатен договор“, се вели во соопштението на министерството на ОАЕ.
Украинскиот претседател Володимир Зеленски претходно во текот на денот изјави дека разговорите во Абу Даби биле „конструктивни“ и дека делегациите од трите земји разговарале за можните параметри за завршување на конфликтот.
Зеленски рече дека разговорите за мирно решавање на конфликтот би можеле да продолжат следната недела.
Украинската делегација на преговорите во Абу Даби ја предводеше секретарот на Советот за национална безбедност и одбрана, Рустем Умеров, американската делегација ги вклучуваше специјалниот претставник на САД Стив Виткоф, советникот на Белата куќа Џаред Кушнер, секретарот на американската армија Ден Дрискол и други, додека руската делегација вклучуваше претставници на военото разузнавање и армијата.
ИЗДВОЕНИ
„Правдата што доцни не е правда“: 36. Mарш за ангелите во Кочани
Топаловски: Брзо возење, црвено светло, нерегистрирани возила и лошо паркирање – тоа се прекршоците со кои ќе стартува „Безбеден град“
Филипче од конгресот: Државотворноста ни тече низ вените – кога ѝ се спуштал мрак на државата, СДСМ била факелот кој го покажувал патот
Алиу: Примарната цел на законот е превенција и поддршка за откажување од цигарите, а не казнувањето
