Најголема замка и опасност за возачите: Дали знаете што е црн мраз?

Со големиот пад на температурата, можна е и појава на црн мраз на патиштата. Овој „невидлив убиец“, како што се нарекува, предизвикува бројни сообраќајни несреќи секоја година, бидејќи возачите го забележуваат само кога е предоцна и кога губи возилото тракција. Тоа е опасност што не проштава ни најмала грешка, дури ни кај најискусните возачи.

Што точно е црн мраз?

Иако го нарекуваме црн, тој, всушност, е тенок и целосно проѕирен слој мраз. Го добил своето име, бидејќи низ него е видлива темна површина, најчесто асфалт, па лесно може да се смеша со влажна површина на патот. За разлика од забележливиот бел мраз или снег, црниот мраз е речиси невидлив, бидејќи не содржи воздушни меурчиња и совршено се вклопува со површината. Најчесто се јавува кога повторно се замрзнува стопениот снег или дожд во текот на ноќта, на пат чија температура паднала под нулата.

Црниот мраз може да се формира и кога е температурата на воздухот над нулата, ако е изладена самата површина на патот под нулата. Најопасните периоди се доцна навечер, ноќе и во раните утрински часови. Особено внимание треба да им се посвети на критичните локации. Мостовите и надвозниците се исклучително ризични, бидејќи се ладат од двете страни, и горната и долната, и затоа замрзнуваат побрзо од остатокот на патот. Опасноста се крие и во засенчените делови: во шумите, под дрвјата и на влезовите и излезите од тунелите. Патиштата со помалку сообраќај се, исто така, меѓу поризичните, бидејќи топлината на возилото нема време да го стопи лизгавиот слој.

Како да ја препознаете опасноста и да го приспособите возењето?

Препознавањето на црниот мраз е тешко, но постојат предупредувачки знаци. Ако патот пред вас изгледа влажно, а тркалата на возилото пред вас не прскаат вода, тоа е речиси сигурен знак за мраз. Исто така, следете го однесувањето на другите возачи: ако некој пред вас неочекувано забави или неговото возило малку се лизга, бидете подготвени. Намалете ја брзината, драстично зголемете го растојанието меѓу возилата и избегнувајте какво било ненадејно движење со воланот или педалите.

Што да направите ако почне да се лизга вашето возило?

Доколку сметате дека вашите гуми го загубиле контактот со земјата, клучно е да останете смирени. Паничните реакции како што се ненадејното сопирање и тресењето на воланот само ќе ја влошат ситуацијата. Прво и најважно, нежно отпуштете го гасот и дозволете возилото само да забави. Не сопирајте. Држете го воланот исправен или свртете го многу малку во насоката во која „бега“ задниот дел од автомобилот. На овој начин ќе помогнете да се исправи возилото. Дури кога ќе почувствувате дека гумите повторно го вратиле држењето на патот, може да продолжите внимателно да возите. Многу е побезбедно да користите моторно сопирање за да забавите, со префрлување во помала брзина, отколку со притискање на педалот за сопирање.

Клучни совети за возачите во случај да наидат на црн мраз

Одржувајте растојание меѓу возилата пред вас, бидејќи е потребно двојно повеќе време да се запре возилото на црн мраз отколку во нормални временски услови.

Не сопирајте нагло и држете го воланот исправен за да избегнете лизгање.

Бидете особено внимателни наутро, бидејќи температурата на воздухот расте многу побрзо од температурата на асфалтот.

Бидете особено внимателни кога возите по мостови и низ тунели. Во случај на лизгање, не правете ненадејно движење со воланот.