Најавениот дожд се очекува да помогне во справувањето со огнените стихии

Според директорот на Дирекцијата за заштита и спасување (ДЗС), Стојанче Ангелов, засега нема алармантни пожари, но посочи дека опасноста од разгорување нови и натаму постои. Тој наведе дека најавените врнежи од УХМР во западните делови од земјата би можеле да помогнат во нивното гаснење.

Како што информираше Ангелов, пожарот кај Рамно сè уште е активен, но е значително намален и очекува тој да биде целосно изгаснат.

– Освен тоа, активен е и пожарот во атарите на селата Селце и Локов, во подрачјето кај Струга и Дебар, каде што втор ден работат тимови на ДЗС составени од доброволни пожарникари – нагласи Ангелов.

Тој додаде дека активен е и пожарот кој од Белица навлегол на територијата на ловиштето „Јасен“. Огнот зафатил поголема тревна површина и делумно навлегол во борова шума. На терен биле екипите на ловиштето, а утринава немало горење бидејќи ниските температури помогнале пожарот да се стави под контрола.

Сепак, според Ангелов, постои опасност пожарот повторно да се активира.

– Се надевам дека прогнозата на УХМР ќе излезе точна, ќе падне дожд и ќе стави крај на овој пожар – рече тој.

Избувнал пожар и кај Вруток, на непристапен терен. Гостиварските пожарникари работеле на негово гаснење и значително го намалиле. Пожарот е под контрола, но сè уште постои можност за негово ширење.

Од Центарот за управување со кризи (ЦУК) информираат дека на територијата на државата, денеска, до 13:00 часот, биле регистрирани вкупно 12 пожари на отворен простор, од кои пет се активни, четири се под контрола, додека три 3 пожари се изгаснати.

Активни се пожарите кај селата Буринец, Локов, Селце  и Елевци-Општина Струга, каде што гори нискостеблеста шума, во селото Велица, местото викано Кајорец кон селото Брезница, кај репетиторот – Општина Македонски Брод, каде што горат нискостеблеста и мешана шума. Потоа, активни се и пожарите во селото Брест, место викано Рамно – Општина Чучер-Сандево, каде што гори мешана шума, во селото Осиче, место викано Рамни Камен – Општина Крива Паланка, каде што е зафатена борова шума, и во селото Печково – Општина Гостивар, каде што горат ниска вегетација и нискостеблести растенија.

Под контрола се пожарите во селото Бенче – Општина Македонски Брод, каде што гори шума, во селото Тајмиште, место викано Дарда – Општина Кичево, каде што е зафатена ниска вегетација, во селото Копаница – Општина Сарај, каде што гори шума и во селата Грачани и Никиштане – Општина Ѓорче Петров, каде што е зафатена шума.

Во исто време, изгаснати се пожарите над селото Кнежино, место викано Црн Камен – Општина Кичево, над селото Стиник – Општина Ново Село и во селото Бардовци – Општина Карпош.

(А. П.)