Нафтата на пат да постигне најголем годишен пад од 2020 година

Цените на нафтата останаа речиси непроменети и минатата недела, додека се намалени за околу 20 % од почетокот на годината. Ако ништо не се промени во меѓувреме, нафтата ја завршува 2025 година со најголем пад на цената од 2020 година.

Цената на барел на лондонскиот пазар се зголеми минатата недела за 0,2 %, на 60,64 долари, додека на американскиот пазар, барелот порасна за 0,1 %, на 56,74 долари.

Организацијата на земјите извознички на нафта (ОПЕК) и нејзините партнери го зголемија производството оваа година, но најголемите светски економии не растат толку брзо како што се надеваа аналитичарите на картелот.

Затоа, цените  на црното злато беа поддржани само од геополитичките тензии, како што е блокадата на испораките на нафта од Венецуела од страна на САД.

„Премијата за геополитички тензии обезбеди краткорочна поддршка за цените, но поради прекумерната понуда, цените на нафтата се под притисок“, објаснуваат аналитичарите од Aegis Hedging.

Цените се под притисок уште повеќе затоа што наскоро би можел да се постигне договор за прекин на непријателствата меѓу Русија и Украина, што би отворило врата за враќање на руската нафта на светските пазари. Поради сето ова, цените на нафтата нагло паднаа од почетокот на годината. На лондонскиот пазар, цената на барелот моментално е во минус за околу 19 %, а на американскиот пазар за околу 21 %.

Ако вака остане во последните денови од оваа година, тоа ќе биде најголемиот годишен пад на цените на „црното злато“ од 2020 година.

Ништо ново не донесуваат ниту процените за следната година. Меѓународната агенција за енергија (ИЕА) проценува дека во 2026 година понудата би можела да ја надмине побарувачката за речиси 4 милиони барели дневно.