Украинскиот министер за одбрана Рустем Умеров по денешните преговори во Истанбул изјави дека украинската делегација го примила рускиот меморандум и дека ќе одлучат за понатамошните чекори во следната недела.
Тој потврди дека двете страни постигнале договор за размена на сите тешко ранети, тешко болни и малолетни затвореници, како и за враќање на телата на паднатите војници, 6.000 за 6.000. Умеров додаде дека на состанокот е разговарано и за можна средба меѓу претседателот Зеленски и Путин, со евентуално учество на американскиот претседател Доналд Трамп на крајот на месецот.
-Повикуваме на вистинска работа за завршување на војната – прекин на огнот, хуманитарни мерки, состанок на лидерите. Ако Русија е сериозна, ќе се согласи. Ако не, мора да следат нови санкции, рече Умеров.
Во врска со размената на заробеници, украинската делегација ѝ предала на руската страна список на деца што сака од Москва да и ги врати, рече шефот на кабинетот на украинскиот претседател, Андриј Јермак, објави Скај њуз.
-Ова се стотици деца нелегално депортирани од Русија, присилно раселени или држени на привремено окупирани територии, рече Јермак, додавајќи дека враќањето на децата е еден од трите основни услови што ги постави претседателот Володимир Зеленски претходниот ден. Останатите два се целосно и безусловно прекин на огнот и размена на затвореници.
Москва тврди дека децата биле евакуирани за да се заштитат од воени активности.
Претседателот Зеленски, кој моментално е во Вилнус на состанок со лидерите на централноевропските и нордиските земји, исто така рече дека се подготвува нова размена на воени затвореници со Русија. Последната рунда, во која беа разменети 1.000 затвореници од двете страни, беше спроведена минатиот месец.
