Дневно поминуваат околу 25.000 луѓе, а излегуваат околу 15.000, вели за грчката државна телевизија ЕРТ претседателот на полициските службеници од Кукуш (Килкис), Плутархос Елефтериадис, за граничниот премин Евзони/Богородица, каде што во одредени денови за влез во Грција се создаваат редици автомобили со туристи, како од нашата земја така и од државите од регионот.
ЕРТ, во прилогот од граничниот премин, коментира дека секојдневно има навалица на Евзони со туристи од Балканот што ја посетуваат северна Грција, додека, пак, претседателот на полициските службеници објаснува дека се обидуваат да одговорат на зголемениот проток на возила и посочува дека само во текот на изминатиот викенд околу 50.000 туристи влегле кај јужниот сосед преку конкретниот граничен премин.
Додаде дека оваа година има дополнителен број полициски службеници и дека се отворени девет шалтери за влез во Грција и шест на излез.
– Позитивно е што оваа година имавме мало зајакнување, што многу помогна да биде одморен полицискиот персонал што работи секојдневно – посочи Елефтериадис.
