Планот на американскиот претседател Доналд Трамп за прекин на војната во Појасот Газа, и покрај тоа што е општ, во моментов е најдобрата опција на маса, изјави денес рускиот министер за надворешни работи Сергеј Лавров.
Во интервју за проектот „Мостови кон Истокот“, тој нагласи дека Русија го смета планот на Трамп за позитивен чекор, бидејќи главната цел е „брз крај на крвопролевањето, спасување животи и обнова на Појасот Газа, градот Газа или она што останало од нив“.
Тој исто така изјави дека Русија го смета планот за реален доколку Палестинците го прифатат, додавајќи дека е важно да престанат сите непријателства.
„Фактот што Хамас става посебен акцент на гаранциите за неповторување на нападите и непонатамошно продолжување на непријателствата во Појасот Газа, а особено во градот Газа, ги одразува лекциите што ги учат од искуството што претходеше на сегашната ситуација“, забележа тој.
Лавров објасни дека верува оти планот на Трамп е „најдоброто решение во моментов“ во смисла дека е прифатлив за Арапите и дека Израел нема да го отфрли.
„Претседателот на САД, Доналд Трамп, ги предложи своите „20 точки“, во кои се споменува зборот „државност“. Но, сè е формулирано доста генерално. Ова е во контекст само на она што останало од Појасот Газа“, рече Лавров.
Тој забележа дека окупираниот Западен Брег не се споменува во овој контекст, пренесува ТАСС.
„Но, ние сме реалисти. Разбираме дека ова е најдоброто нешто што е на маса во моментов“, рече тој.
Лавров, исто така, нагласи дека колективното казнување на палестинскиот народ за нападот на Хамас врз Израел во октомври 2023 година е „грубо кршење на меѓународното хуманитарно право“.
„Остро го осудивме терористичкиот напад извршен од Хамас на 7 октомври. Тоа е кривично дело, но „колективното казнување“ на целиот палестински народ за ваков вид терористички напад е исто така грубо кршење на меѓународното хуманитарно право“, рече Лавров.
