Индискиот премиер Нарендра Моди денес, по билатералната средба со кинескиот претседател Си Џинпинг во кинескиот пристанишен град Тјенџин, изјави дека е постигнат договор меѓу специјалните претставници на Индија и Кина во врска со управувањето со границите и дека се воспоставуваат директни летови меѓу двете земји, пренесе „Танјуг“.
Моди, кој ќе учествува на дводневниот самит на Шангајската организација за соработка (ШОС), по средбата со кинескиот претседател изјави дека интересите на 2,8 милијарди луѓе од двата народа се поврзани со соработката меѓу двете земји и дека тоа ќе придонесе за благосостојбата на целото човештво, објави „Индија Тудеј“.
Тој ја нагласи посветеноста на Индија за подобрување на односите врз основа на меѓусебна доверба, почитување и разбирање.
„Се договоривме за управување со границите и директните летови меѓу двете земји се обновуваат“, рече Моди по 40-минутната средба со Си Џинпинг.
Моди рече дека минатогодишниот самит на БРИКС во рускиот град Казан дал позитивна насока на односите меѓу Индија и Кина и дека повлекувањето на трупите од границата создало атмосфера на мир и стабилност.
За време на разговорите со Моди, Си Џинпинг го оцени и минатогодишниот состанок во Казан како успех.
„Задоволен сум што се сретнав со премиерот Моди“, рече Си Џинпинг по билатералната средба, поздравувајќи го индискиот премиер во Тјенџин.
Моди е во Кина за прв пат по седум години за да присуствува на дводневниот состанок на Шангајската организација за соработка, на кој присуствува и рускиот претседател Владимир Путин, како и лидери од Централна, Југоисточна и Јужна Азија и Блискиот Исток.
Индиските медиуми оценија дека средбата меѓу Моди и Си Џинпинг е продолжение на почетното затоплување на односите меѓу Индија и Кина, што се случи на минатогодишниот состанок во Казан.
