Денес Македонскиот народен театар со изведба на повеќе претстави ќе одбележи 80 години од првата премиера. На репертоарот се: претставите „Бели ноќи“, „Мој термин“ и „Торонто експрес“.
Театарот е основан со Одлука на Президиумот на АСНОМ од 31 јануари 1945 година, како драмски театар во истата зграда на предвоениот. Првата претстава изведена на неговата сцена е лирската трочинка „Платон Кречет“ од украинско-советскиот драматург Александар Корнејчук, во препев на Блаже Конески. Премиерата се случува на 3 април 1945 година, во режија на Димитар Ќостаров, а во главната улога игра Илија Милчин.
-Театарот е место каде што се случува нешто исклучително. Тука се преплетуваат режисерските идеи; најсилно чука актерското срце; се слуша зборот на драматургот; шепотот на суфлерот; сценографите, костимографите и композиторите ја оплеменуваат сцената со својот креативен израз; светлото, дизајнот и тон создаваат магија; големиот број на луѓе зад сцената се секогаш посветено тука; а менаџерскиот тим е тука да ја поддржи секоја идеа. Се создава магија, а публиката го восприема секој атом на театарската уметност. Македонски народен театар е сила која опстојува 80 години!, напишаа од МНТ по повод одбележувањето 80 години.
