Миркуловски се врати во македонскиот  ракомет (ВИДЕО)

Македонската ракометна легенда Филип Миркуловски се враќа да работи во репрезентативниот ракомет, ама на нова улога. Славниот среден бек ја доби довербата од Ракометната федерација на Македонија и во иднина ќе биде спортски координатор на машките селекции. Оваа одговорна улога популарниот „Жути“ ќе ја преземе веднаш.

„Убаво е да се видат познати лица по долги години назад во Македонија. Благодарен сум за довербата да работам на вака витална функција. Јас сум тука да дадам се од себе и своето знаење со моето искуство играјќи во Германија. Главната цел ќе биде развојот на младинските категории, да ги искоординирам и сите селектори. Мора да ја подобриме комуникацијата меѓу генерациите, за сите да бидат подготвени да бидат дел од системот. Прво што треба да направиме е креација на пионерска категорија и да им дадеме предност на младите деца за да ги достигнеме сите големи селекции. Ќе дадам свој максимум за да ги подобриме условите и да го вратиме младинскиот ракомет таму каде што му е местото, кажа Миркуловски.

Филип Миркуловски беше еден од најголемите воини на Македонија. Своевремено средниот бек беше најборбен во тимот, никогаш не се откажуваше и добиваше многу „ќотек“ на терените. По крајот на играчката кариера Миркуловски остана во германскиот тим Вецлар каде што работеше како тренер и помошник. Сепак, пред крајот на сезоната тој се раздели со овој клуб.