Министерот за надворешни работи дециден: Иран никогаш нема да се откаже од своето право да збогатува ураниум

Иран никогаш нема да се откаже од своето право да збогатува ураниум, дури и ако му се „наметне“ војна, изјави денес иранскиот министер за надворешни работи, Абас Аракчи.

Аракчи на форум во Техеран рече дека „Иран платил многу висока цена за својата мирна програма за збогатување на нуклеарно оружје“, објави денес „Тајмс оф Израел“.

„Зошто толку инсистираме на збогатување (на ураниум) и одбиваме да се откажеме од него дури и ако ни се наметне војна? Бидејќи никој нема право да го диктира нашето однесување“, рече Аракчи, два дена по средбата со американскиот претставник Стив Виткоф во Оман за разговори за ограничување на нуклеарната програма.

Тој рече дека неговата земја не е заплашена од распоредувањето на американската морнарица во регионот.

„Нивното воено распоредување во регионот не нè плаши“, рече Аракчи.

Американскиот претседател Доналд Трамп постојано го предупредува Иран дека ќе употреби сила за да ја принуди земјата да се согласи на нуклеарен договор, по што започна со трупање војници во регионот за да ги потисне протестите во Иран во кои загинаа илјадници луѓе, а десетици илјади беа притворени.

Пред војната со Израел и САД во јуни минатата година, Иран збогатуваше ураниум до чистота од 60 проценти, краток, технички чекор кон нивото потребно за производство на оружје.

Меѓународната агенција за атомска енергија соопшти дека Иран е единствената земја во светот што збогатува ураниум до тоа ниво без да биде вооружена со бомба.

Државниот секретар на САД, Марко Рубио, минатата недела изјави дека разговорите меѓу неговата земја и Иран мора да се однесуваат на нуклеарната програма на Техеран, неговите балистички ракети, поддршката за прокси терористички групи низ регионот и „неговиот третман на сопствениот народ“, пренесува „Танјуг“.