Минималецот во Македонија и во Црна Гора за една година се зголемил за над 20 отсто

Милиони работници низ ЕУ продолжуваат да заработуваат минимална плата. Праговите имаат цел да обезбедат основен животен стандард за работниците, иако честопати не успеваат да се зголемат нивоата со инфлацијата. Во јули 2025 година, месечната минимална плата во ЕУ се движеше од 551 евра во Бугарија до 2.704 евра во Луксембург, објави „Евростат“.

Што се однесува до земјите кандидатки за ЕУ, Украина има најниска минимална плата, од само 164 евра. Пет земји од ЕУ – Италија, Данска, Шведска, Австрија и Финска  воопшто немаат национална минимална плата.

Постојат значајни разлики кај минималната плата во Европа, а „Евростат“ ги групира земјите на три нивоа на плати. „Еуроњуз“ додаде четврта категорија, која ги групира земјите со минимална плата под 600 евра и ги вклучува земјите кандидати за ЕУ.

Во највисоката група со над 1.500 евра минимална плата, освен Франција, која нуди 1.802 евра, сите други земји плаќаат над 2.000 евра месечна минимална плата. Освен Луксембург, тука се и Ирска (2.282 евра), Холандија (2.246 евра), Германија (2.161 евра) и Белгија (2.112 евра).

Во средната група, со минимална плата од 1.000 до 1.500 евра, влегуваат: Шпанија (1.381 евра), Словенија (1.278 евра), Полска (1.100 евра), Литванија (1.038 евра), Грција (1.027 евра), Португалија (1.015 евра) и Кипар (1.000 евра). Неколку земји во средната група се малку над прагот од 1.000 евра.

Хрватска (970 евра), Малта (961 евро), Естонија (886 евра), Чешка (841 евра), Словачка (816 евра), Романија (797 евра), Латвија (740 евра), Унгарија (727 евра), Црна Гора (670 евра) и Србија (618 евра) ѝ припаѓаат на ниската група земји, со минимална плата во Европа, меѓу 600 и 999 евра.

Во групата со многу мала минимална плата под 600 евра се неколку земји, вклучувајќи и една членка на ЕУ. Оваа најниска група е составена претежно од земји кандидати за ЕУ, Македонија (396 евра), Турција (558 евра), Бугарија (551 евра), Албанија (408 евра), Молдавија (285 евра) и Украина (164 евра).

Според податоците, постои голема географска поделба во номиналните минимални плати во цела Европа. Ова е најзабележливо меѓу Западна и Источна Европа. Општо земено, четирите групи плати одразуваат различни региони на ЕУ.

Земјите во највисоката група се, главно, во Западна и во Северна Европа. Средната група вклучува неколку земји од Јужна и од Централна Европа. Ниските и многу ниските групи се состојат претежно од источноевропски, балкански земји и од земји кандидати за ЕУ.

Во текот на последните шест месеци, од јануари до јули 2025 година, минималната плата остана непроменета во повеќето земји од ЕУ и во земји кандидатки. Во евра, Македонија забележа најголемо зголемување од 7,7 %, по што следува Грција со 6,1 %. Турција забележа најголем пад – од 21,2 %, а Украина пад од 9,9 %.

Во земјите кандидатки, промените во девизните курсеви одиграа голема улога. На пример, во Турција, минималната плата остана иста во турска лира во овој период. Сепак, оние што заработуваат минимална плата беа најмногу погодени од највисоката стапка на инфлација во Европа.

Меѓу јули 2024 и јули 2025 година, Црна Гора и Македонија забележаа најголемо зголемување на минималната плата, двете над 20 %. Спротивно на тоа, Украина и Турција доживеаја најголем пад.

Меѓу земјите од еврозоната, Хрватска забележа најголем пораст од 15,5 %, придружена од Литванија со 12,3 %.

Во Франција, зголемувањето беше скромно, само 2 %. Шпанија и Германија забележаа малку поголеми добивки, со 4,4 % и 5,2 % соодветно. Сепак, кога ќе се земе предвид инфлацијата, реалната вредност на ова зголемување е, веројатно, многу помала.

Националната минимална плата во Велика Британија се зголеми за 6,7 %, од април 2025 годин