Милорад Додик повеќе не е претседател на Република Српска: Судот на БиХ ја отфрли жалбата

Милорад Додик повеќе не може да биде претседател на Република Српска, еден од двата ентитети во Босна и Херцеговина (БиХ).

Ова е последица на отфрлањето на жалбата на Додик против одлуката на Централната изборна комисија со која му беше одземен мандатот две недели претходно.

Жалбата е отфрлена како неоснована, со што се утврдува престанок на мандатот на претседателот на Република Српска, Милорад Додик, наведено во одлуката на Апелациониот совет на Судот на Босна и Херцеговина на 18 август.

На Додик му беше одземен мандатот од страна на Централната изборна комисија по конечната пресуда на Судот на БиХ, со која тој беше осуден на една година затвор и шестгодишна забрана за политичка активност поради непочитување на одлуките на високиот претставник на меѓународната заедница, Кристијан Шмит.

Наместо една година затворска казна, Додик одлучи да ја замени со парична казна, објави Судот на БиХ на 12 август.

Што значи пресудата?
Конечната пресуда на Апелациониот совет му забрани на Додик да ја извршува функцијата претседател на два начина.

Според Изборниот закон на БиХ, на секој избран или назначен функционер осуден на шест месеци затвор или подолго му престанува мандатот.

„Предвремените избори ќе се одржат во рок од 90 дена од распуштањето на избраното тело или престанокот на неговиот мандат во согласност со уставот и законот“, прецизира Изборниот закон на БиХ.

Централната изборна комисија, главното изборно тело во земјата, му го одзеде мандатот на Додик на 6 август, а тој поднесе жалба на одлуката.

Истиот ден кога неговата жалба беше одбиена, со што заврши неговиот мандат како претседател на Република Српска, премиерот на тој ентитет, Радован Вишковиќ, поднесе оставка.

Додик ја замени својата затворска казна во парична казна, што е право на секое лице осудено на затворска казна до една година, освен за оние осудени за кривични дела против интегритетот на БиХ и кривични дела поврзани со тероризам.

Тој ја откупи својата затворска казна за 36.500 конвертибилни марки, или нешто повеќе од 18.000 евра.

„Затворската казна изречена на осудениот Милорад Додик беше заменета со парична казна“, се вели во соопштението на Судот на БиХ.

Заменувањето на затворската казна во парична казна не ги менува другите последици од пресудата, изјави за Би-Би-Си Вехид Шехиќ, поранешен претседател на Централната изборна комисија на БиХ (ЦИК).

Би-Би-Си не доби официјално соопштение од Централната изборна комисија, телото одговорно за спроведување на изборите и за повлекување и распределба на мандатите.

Во телефонски разговор со висок извор во ЦИК, ни беше објаснета постапката.

Што рече Додик?
„Јас останувам претседател“, рече Додик за време на првата прес-конференција по пресудата.

Тој ги повика институциите на Република Српска да не ги почитуваат одлуките на Централната изборна комисија.

„И да ја ангажираат полицијата за да не се дозволи ниту едно гласачко место“, додаде Додик, кој беше притворен во друг случај за кршење на уставниот поредок и неодговарање на поканите од Обвинителството.

Државната агенција за истраги и заштита претходно се обиде да го притвори Додик, но тој беше чуван од припадници на Министерството за внатрешни работи на Република Српска.

Недели по првата пресуда, налогот за апсење на Додик беше укинат откако тој се појави на суд во тајност.

Тој ги нарече најновите судски постапки на мрежата X „синхронизиран напад врз Србија и Република Српска“.