Мицкоски го честита Денот на Бошњаците: Тие се доказ дека и малите заедници можат да имаат голема улога во заедничката приказна на државата

Бошњачката заедница е доказ дека и малите заедници можат да имаат големо срце и голема улога во заедничката приказна на државата – порача премиерот Христијан Мицкоски од Свечената академија по повод 28 Септември – Меѓународниот ден на Бошњаците. Премиерот упати честитки до припадниците на Бошњачката заедница во земјава и потенцираше – ние немаме големи и мали заедници, ние сме сите Македонија.

-Ние го избираме патот на заедништвото, солидарноста и почитта. Затоа денот на Бошњаците не е само ден на една заедница туку на цела Македонија. Тоа е ден кој не потсетува дека иднината можеме да ја градиме само заедно, со почит, со доверба и со љубов кон заедничкиот дом, изјави премиерот Христијан Мицкоски.

Националниот координатор за меѓуетнички и меѓуресорска соработка Салко Куч рече дека Денот на Бошњаците е порака за пријателство, дијалог и соработка, вредности втемелени и во духот на Македонија.

-Нека овој празник не потсети на нашата обврска да го чуваме достоинството на сите заедници, да ја градиме Македонија како земја на еднакви права и како дом на демократијата и во Европа, изјави Националниот координатор за меѓуетнички и меѓуресорска соработка Салко Куч.

Честитки до Бошњачката заедница во земјава по повод 28 Септември – Меѓународниот ден на Бошњаците упатија и претседателката Гордана Силјановска Давкова, претседателот на Собранието Африм Гаши, вицепремиерот и министер за односи меѓу заедниците Иван Стоилковиќ, лидерот на СДСМ Венко Филипче како и лидерите на останатите политичките партии во земјава.