Металка цевка, монети… Папата Франциск пред смртта одлучил со кои предмети сака да биде погребан

По смртта на папата Франциск, неговото тело беше изложено во Ватикан. Јавната проштална обиколка во базиликата Свети Петар завршува вечерва, а погребот ќе се изврши утре, 26 април.

Илјадници верници во последните денови пристигнаа во Ватикан за да му оддадат почит, а на утрешниот погреб се очекува да присуствуваат до 200.000 луѓе.

Најавено е пристигнување на повеќе од 130 странски делегации, меѓу кои и принцот Вилијам, Доналд Трамп и Володимир Зеленски.

Папата Франциск ги истакна своите желби во врска со погребот додека тој беше жив, вклучително и неколку отстапувања од традиционалниот обред.

За ковчегот избрал едноставен галванизиран ковчег во дрвена кутија, нагласувајќи дека сака „едноставен“ погреб. Со него ќе бидат закопани одредени предмети.

Како што и претходно ја изрази својата желба, папата ќе биде погребан во базиликата Санта Марија Маџоре во Рим. Во својот последен тестамент и завет тој напишал: „Посакувам моето последно земно патување да заврши токму во ова древно маријанско светилиште, каде што секогаш застанував на почетокот и на крајот на секое апостолско патување за да се молам, доверувајќи ги моите намери на Пречистата Мајка и благодарејќи ѝ за нејзината нежна и мајчинска грижа“.

Вечерва, во пресрет на погребот, телото на папата Франциск ќе биде посипано со света вода, а неговото лице ќе биде покриено со бела свилена ткаенина.

Пред да се запечати ковчегот, внатре ќе биде поставена мала кеса со монети издадени за време на неговиот 12-годишен понтификат.

Тој, исто така, ќе биде погребан со метална цевка која содржи документи и кратка папска биографија. Оваа кратка биографија ќе се прочита на глас пред да биде ставена во ковчегот.

Познат како скромен и едноставен човек и водач, папата Франциск ги истакна овие квалитети преку неговите инструкции за погреб, изразувајќи незадоволство од „прекумерната помпа“ на традиционалните погребни обреди на Ватикан. Во тестаментот Папата дополнително напиша: „Гробот да биде во земја, едноставен, без посебни украси, само со натпис: Франциск“.

Завршувајќи ги своите последни писмени сведоштва, Папата додаде: „Господ обилно да ги награди сите оние кои ме сакаа и кои продолжуваат да се молат за мене. Му ги принесувам на Господа страдањата што го одбележаа последниот дел од мојот живот за мир во светот и братство меѓу народите“.