Меси одби понуда од 1,4 милијарди евра

Претседателот на саудискиот клуб Ал-Итихад, Анмар Ал Хаили, повторно ја изрази својата желба да го доведе Лионел Меси, наведувајќи дека е подготвен да му понуди на аргентинскиот фудбалер бланко чек. Светските медиуми објавуваат изјави во кои Ал Хаили нагласува дека парите нема да бидат пречка за завршување на овој трансфер.

Ал Хаили наводно е подготвен да му дозволи на Меси самиот да ги одреди финансиските услови и времетраењето на договорот.

„Доколку Меси сака да потпише за Ал-Итихад, ќе му дадам бланко чек на кој може да напише кој било износ што го сака, со договор за кој било период што ќе го избере, дури и ако е доживотен“, рече Хаили.

Тој додаде дека доаѓањето на Меси би имало огромно значење за клубот.

„Доколку Меси беше тука во Саудиска Арабија носејќи го дресот на Ал-Итихад, парите не би ми значеле ништо. Ќе ја славевме лигата пред да започне, бидејќи би го имал најдобриот играч во историјата на фудбалот.“

Претседателот на Ал-Итихад потврди дека претходно се обидел да го ангажира Меси по неговото заминување од Париз

„Да, го контактирав кога му истече договорот со ПСЖ и му понудив договор од 1,4 милијарди евра, или 88 милиони евра годишно, но тој одби без дури ни да ја слушне понудата бидејќи неговото семејство ја претпочиташе Америка. Го почитувам тоа и вратата на Ал-Итихад е секогаш отворена за него кога и да сака да дојде.“

Во врска со новиот обид да го доведе, Ал Хаили рече.

„Повеќе нема да се караме за бројки, едноставно ќе му дадам на Меси бланко чек да напише што сака. Тоа е најдобро, а ќе видиме“.

И покрај дарежливата финансиска понуда, преселбата на Меси во Саудиска Арабија се смета за малку веројатна. Аргентинскиот фудбалер се прилагоди на животот во САД, каде што живее со своето семејство, што би можело да влијае на одлуката за евентуална промена на неговата средина.