Мерц со апел до Зеленски: Украинските младичи да останат во својата земја, каде што се потребни

Германскиот канцелар Фридрих Мерц денес го повика украинскиот претседател Володимир Зеленски да се осигури дека младите мажи од Украина да не доаѓаат во Германија во голем број како бегалци, наведувајќи дека тие се „потребни“ во Украина.

За време на телефонскиот разговор, Мерц разговараше со Зеленски и за енергетскиот скандал што ја зафати украинската влада, објави денес „Ројтерс“.

Мерц, исто така, рече дека германската влада планира да ги прилагоди бенефициите што им се даваат на украинските бегалци, така што „стимулациите за работа ќе ги надминат стимулациите за останување во системот за социјална помош“.

Земјите од Европската Унија регистрираа 79.205 украински бегалци во септември, што е најголем месечен број од август 2023 година, според податоците на „Евростат“. Зголемувањето на бројот на бегалци дојде по одлуката на Украина во август 2025 година да им дозволи на мажите на возраст од 18 до 22 години право слободно да ја преминуваат границата. Повеќе од 1,2 милиони украински бегалци, или 28,3 проценти од вкупниот број бегалци во ЕУ, моментално се сместени во Германија, соопшти „Евростат“.