Германскиот канцелар Фридрих Мерц изјави денеска дека Евопа ќе го зголеми притисокот на Москва преку санкции. Мерц по разговорот на американскиот претседател Доналд Трамп со клучните европски лидери, веднаш по неговиот телефонски разговор со лидерот Владимир Путин, истакна дека Европа и САД се обединети во „тесната поддршка на Украина и на нејзиниот пат кон прекин на огнот“.
„Претседателот на САД и европските партнери се договорија за следните чекори, тесно да го координираат процесот на преговори и да одржат технички состанок“, наведе портпаролот на германската влада Штефан Корнелиус.
Претседателката на Европската комисија Урсула фон дер Лајен му се заблагодари на Трамп за „неговите неуморни напори да се воспостави прекин на огнот во Украина“.
„Сакам да му се заблагодарам на претседателот Трамп за неговите неуморни напори да обезбеди прекин на огнот во Украина. Важно е Соединетите Американски Држави да останат ангажирани. Ќе продолжиме да го поддржуваме Володимир Зеленски во постигнувањето траен мир во Украина“, наведе таа на платформата „Икс“.
Трамп по телефонскиот разговор со Путин разговараше со Мерц, Фон дер Лајен, Макрон, финскиот претседател Александар Стуб и италијанската премиерка Џорџа Мелони и ги извести за исходот од разговорот со Путин, пренесува „Дојче веле“.
Соединетите Американски Држави се сложија да одржуваат „тесна координација“ со европските сојузници во преговорите за Украина, пренесува „Танјуг“.
