Мемов: Не се размислува за зголемување на старосната граница за пензионирање

Линеарното зголемување е за усогласување со животниот стандард, изјави директорот на Фондот за ПИОМ, Никола Мемов, во интервју на Радио Слободна Европа.

Тој рече дека тоа е исправно бидејќи цените се подеднакво покачени за сите.

Мемов уверува дека не се размислува за зголемување на старосната граница за пензионирање.

„Има две иницијативи од граѓани доставено до Уставниот суд и ќе видиме сега. Одлуката е пред донесување, односно трае јавната расправа околу ова значајно прашање во општеството. Сакам да истакнам дека измената на Законот за пензиско инвалидско осигурување беше донесена минатата година, на барање на пензионерите се донесе оваа одлука усогласувањето на пензиите со швајцарскиот модел – процентуално се замени со линеарно зголемување на пензиите односно линеарно усогласување на пензиите на сите 345.000 пензионери“, вели Мемов.

Согласно со измените на законот донесени оваа година, нагласи Мемов, во март месец пензионерите ќе добијат линеарно покачување од 1.000 денари, додека во септември е планирано веќе да си важат старите одредби од Законот за пензиско каде што останува одредбата за процентуално усогласување на пензиите согласно со швајцарскиот модел.