Мекларен со „тајно оружје“ ќе ја нападне титулата во Ф1

Мекларен направи уште еден голем чекор напред во Формула 1, а неговата сила ја потврди триумфот на Ландо Норис на Големата награда на Холандија. Победата во Зандворт беше втора последователна за Мекларен по успехот во Будимпешта и болидот повторно покажа дека одлично функционира на патеки со големо аеродинамично оптоварување.

Зад одличниот резултат, сепак, стојат и неколку важни подобрувања. Мекларен воведе промени на задниот под, каналите за ладење на задните сопирачки, но и нови предни бандажи. Целта на бандажите беше подобро загревање на предните гуми и нивно полесно одржување во оптималниот температурен прозорец, што беше еден од проблемите со кои се соочуваше тимот претходно во сезоната.

Во Монако, Австралија и во Кина, Мекларен имаше сериозни проблеми со загревањето и со прилепувањето на гумите, но во Зандворт ситуацијата беше значително подобра. Особено впечатливо беше однесувањето на болидот во брзите кривини, каде што дополнителниот аеродинамичен притисок му овозможи на Норис да биде исклучително конкурентен.

Новите предни бандажи, произведени од долгогодишниот партнер „Енкеи“, одиграа важна улога во овој процес. Со поспецифичен дизајн на внатрешноста, инженерите успеале подобро да управуваат со топлината во склопот на тркалото. Дополнително, изменетиот капак го ограничува ладењето од воздухот и помага топлината поефикасно да се пренесува кон гумата.

Интересно е што Мекларен не направил промени на задниот бандаж. Причината е што таму приоритет било одржувањето на температурата под контрола, особено поради деградацијата на задните гуми. Така, тимот направил прецизен баланс меѓу загревањето на предните и контролата на задните гуми.

Резултатот беше болид што во Зандворт делуваше многу постабилно и поконкурентно. Во квалификациите, Норис ја освои пол-позицијата, додека голем дел од конкурентите се мачеа да ги загреат гумите и мораа да прават дополнителни кругови. Тоа беше уште еден показател дека функционираат инженерските промени на Мекларен.

Шефот на тимот, Андреа Стела, истакна дека Будимпешта и Зандворт природно му одговараат на болидот поради нивото на аеродинамично оптоварување. Сепак, перформансите покажаа дека Мекларен не се потпира само на карактеристиките на патеката туку и дека подобрувањата по летната пауза му овозможиле да направи сериозен чекор напред.

Мекларен сега изгледа како тим што повторно има решение за еден од најголемите проблеми: контролата на гумите. Ако продолжи овој напредок и на следните патеки, Ландо Норис и Мекларен би можеле да бидат уште посериозна закана за конкуренцијата во продолжението од сезоната.