Меѓународната хуманитарна организација „Лекари без граници“ го напушти градот Газа

Една од најголемите здравствени невладини организации во светот, „Лекари без граници“, денес изјави дека израелската воена офанзива врз Газа ги довела во опасност нејзините вработени и пациенти, принудувајќи ги да ги суспендираат медицинските услуги во областа, пренесе „Фонет“.

„Немаме друг избор освен да ги суспендираме нашите активности, бидејќи нашите клиники се опкружени со израелски сили“, рече Џејкоб Гренџер, координатор за итни случаи во Газа на групата, во изјава, објави „Си-ен-ен“.

„Ова е последното нешто што го сакавме, бидејќи потребите во градот Газа се огромни, а најранливите луѓе – бебиња на неонатална нега, луѓе со сериозни повреди и опасни по живот болести – не се во можност да се движат и се во голема опасност“, додаде тој.

Здравствените установи низ енклавата се сериозно ограничени во нивната способност да лекуваат пациенти поради израелските воздушни напади и строгите контроли врз протокот на медицинска и прехранбена помош, што претставува огромен товар врз медицинскиот персонал.

Од „Лекари без граници“ соопштија дека само минатата недела спровеле повеќе од 3.600 прегледи, при што биле третирани повеќе од 1.600 луѓе од неухранетост и повреди од траума, изгореници и бремени жени.

„Иако бевме принудени да ги прекинеме нашите активности во градот Газа, имаме за цел да продолжиме да ги поддржуваме основните услуги во установите на Министерството за здравство, вклучувајќи ги болниците Ал-Хела и Ал-Шифа, сè додека не почнат да работат“, се вели во соопштението на „Лекари без граници“.