Екстремните температури го претвораат Средоземното Море во тропска зона, уништувајќи го морскиот живот и создавајќи совршени услови за бури, токсични алги и инвазивни видови. Поради рекордно високите температури, кои значително го менуваат биодиверзитетот, Средоземното Море сè повеќе потсетува на тропски региони како Карибите. Температурите на морето достигнуваат до 29°C, што претходно не беше вообичаено. Земјите како Шпанија, Италија, Франција и Грција се најпогодени.

Експертите велат дека ваквите температури повеќе не се исклучок, туку дека стануваат ново правило поради глобалното затоплување предизвикано од емисиите на фосилни горива.

Светот се соочува со сериозна климатска криза, а Медитеранот во моментов е едно од жариштата.

Според податоците од Европската климатска служба „Коперникус“, на крајот на јуни температурата на морето веќе била до 5°C повисока од просекот за тој период од годината. Најголемите промени се забележани во западниот Медитеран, во близина на Шпанија и Италија.

Овие промени предизвикуваат голем број последици: почести и посилни бури, поплави, топлотен стрес кај луѓето, но и масовна смрт на морски организми како што се коралите и морските ежови.

Инвазивни видови, како што се скорпијата и португалските каравели продираат во морето, додека токсичните алги се шират, а нивоата на кислород во длабоките слоеви на водата се намалуваат.

Медитеранот е особено ранлив бидејќи е полузатворен слив, па затоа топлинската енергија се задржува подолго отколку во отворените океани.

Овој регион веќе доживува двојно поголемо глобално просечно затоплување, што создава идеални услови за појава на сè помоќни медитерански урагани, таканаречени „медикани“.

Заклучокот е јасен: климатските промени веќе ја менуваат природата на Медитеранот.

За да се спречат најлошите последици до 2050 и 2100 година, неопходни се итни мерки како што се намалување на емисиите на гасови, ефикасна климатска политика и посилна свест за важноста на заштитата на животната средина.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ