Масовни прекини на струјата во Украина: Речиси 60.000 луѓе се во мрак по рускиот напад

Околу 58.000 луѓе останаа без електрична енергија поради рускиот напад врз Запорожје, наведе началникот на регионалната воена администрација Иван Федоров на Телеграм, пренесува РБЦ Украина. Најмалку две лица се повредени во нападот.

Федоров додаде дека ќе се работи на враќање на електричната енергија штом дозволи безбедносната ситуација. Тој исто така рече дека 17 приватни домови биле оштетени како резултат на рускиот напад.

– Во врска со состојбата на повредените, прегледани се 44-годишна жена и 91-годишен маж и им е укажана медицинска помош – рече Федоров.

Како што се приближува зимата, Русија ги засилува нападите со ракети и беспилотни летала врз енергетската инфраструктура за да предизвика прекини во снабдувањето со електрична енергија што го принудуваат Киев постојано да ги санира штетите.

„Тимовите ќе ја вратат електричната енергија штом безбедносната ситуација ќе дозволи“, рече Иван Федоров. На комуникациската платформа Телеграм, тој објави ноќни фотографии од згради со уништени фасади и прозорци.

Руската артилерија, ракети и беспилотни летала го напаѓаат регионот Запорожје речиси секој ден. Многу домови се уништени, инфраструктурата е осакатена, а десетици луѓе се убиени додека Москва врши притисок врз одбраната на Украина и ги нарушува врските меѓу јужна Украина и остатокот од земјата.