Се разгорува војната меѓу довчерашните пријатели, американскиот претседател, Доналд Трамп, и неговата довчерашна десна рака за кратење на владините трошоци, милијардерот Илон Маск.
Повод е новиот закон за кастрење на трошоците и субвенциите во американскиот буџет, кој Трамп го промовира како „голем и прекрасен закон“, а Маск го нарекува „луд и деструктивен“. Конфликтот кулминираше со заканата на Маск дека ќе ги „урне“ конгресмените што ќе гласаат за законот дури и ако, како што рече, тоа му биде „последното нешто што ќе го направи на Земјата“. Маск најави и формирање нова политичка партија – Американска партија доколку биде усвоен законот.
Во одговор, Трамп го нападна со објава дека добил „најмногу државни субвенции од кој било човек во историјата“ и предложи Одделот за ефикасност (ДОГЕ) што го водеше, да ги провери сите бенефиции што ги користеле компаниите на Маск од федералниот буџет.
– Можеби без тие пари Маск ќе требаше да ја затвори својата продавница и да се врати во Јужна Африка. Можеби ќе треба да ги стопи своите ракети, да запре со автомобилите и да заштедиме многу пари – напиша Трамп.
