Маск: Германија ги учи децата да се мразат себеси

Основачот на „Тесла“ и „СпејсИкс“ и поранешен советник во администрацијата на Трамп, Елон Маск, предизвика нова контроверзност во Германија откако ја поврза имиграциската политика на земјата со она што тој го нарече „национална тенденција кон самоубиство“ на неговата платформа „Икс“.

Маск одговараше на објавите што го поврзуваат порастот на сексуалните злосторства со приливот на мигранти. Според него, Германците со децении живеат во систем во кој младите луѓе се учат на самоодрекување и национална вина.

„Германските деца ги учат да се мразат себеси во училиште уште од крајот на Втората светска војна. Тенденцијата кон национално самоубиство е природен резултат на таквото воспитување“, напиша Маск.

Неговите коментари предизвикаа силни реакции во германската јавност и политика. Бундестагот неодамна отвори истрага за можното мешање на Маск во изборниот процес, откако тој разговараше со лидерката на десничарската Алтернатива за Германија (AfD) Алис Вајдел непосредно пред изборите во февруари, во разговор што беше емитуван на платформата „Икс“.

Маск постојано ги критикуваше германските власти и поранешниот канцелар Олаф Шолц, кого го нарече „будала“, тврдејќи дека „само АфД може да ја спаси Германија“.

Неговите ставови, изразени во контекст на растечките тензии во ЕУ околу миграциската политика, поттикнаа дебата за тоа каде е линијата помеѓу слободата на изразување и надворешното политичко влијание.