Поранешниот возач на Ферари, Фелипе Маса, може да продолжи со дел од својата тужба за скандалот „Крашгејт“ на Гран Прито на Сингапур во 2008 година, но Високиот суд во Лондон ги отфрли другите елементи од неговиот случај, што значи дека Бразилецот не може да ја бара шампионската титула од таа сезона.
Во пресудата на судот се вели дека Маса може да бара отштета за контроверзните настани во Сингапур, но неговото барање да биде прогласен за шампион е одбиено, објави „Би-Би-Си“.
Маса поднесе тужба против поранешниот шеф на Формула 1, Берни Еклстоун, и поранешното управно тело на натпреварувањето поради наводен заговор за да го спречат да ја освои титулата, која ја освои тогашниот возач на Мекларен, Луис Хамилтон.
Во инцидент познат како „Крашгејт“, тогашниот возач на Рено, Нелсон Пике Џуниор, намерно предизвикал несреќа во 14-тиот круг од Гран При на Сингапур за да го извади безбедносното возило, дозволувајќи му на неговиот тимски колега Фернандо Алонсо да победи.
Хамилтон заврши трет, додека Маса, кој ја водеше трката пред да излезе безбедносното возило, заврши 13-ти и не успеа да освои бодови.
Маса во својата тужба тврдеше дека Еклстоун знаел дека несреќата била намерна и дека ниту тој ниту ФИА не го истражувале инцидентот. Тој побара отштета од 64 милиони фунти.
