„Системот убива – институциите молчат“ беше мотото на денешниот, шести протестен „Марш за ангелите“ во Кочани што го организираа семејствата на починатите во пожарот во клубот „Пулс“. Со денешниот марш се одбележаа два месеци од страотниот пожар во т.н. кабаре „Пулс“- трагедија која однесе 62 животи.
Маршот започна во 16 часот и 5 минути, а поворката во молк и тишина ја предводеа роднини на загинатите кои на градите носеа нивни фотографии. Тргнаа од „Паркот на револуцијата“ во центарот на градот, поминаа покрај полициската станица, судот и обвинителството.
Присутните носеа пароли на кои пишуваше „Нема трагедија, има злосторство“, „Пратеници, голема (не)благодарност за поддршката“, „Не беа жртви на пожар, беа жртви на системот“, „Затворени очи, отворени гробови“ „Пожарот ги зеде телата, системот ги уби душите“…Беа побарани неселективна правда и подобри услови за лекување на повредените.
Во чест на настраданите, особено на келнерите кои животот го загубија работејќи, се одржа и симболична трка на келнери, поддржана од неколку угостителски објекти од Кочани.
– Ова не беше натпревар, туку гест на почит. Нашите колеги беа херои – работеа со насмевка и останаа до крај. Овој марш е наш заеднички глас против молкот и неправдата, изјави Јане Гицев, организатор на трката.
Протестот заврши таму каде што започна – во Паркот на Револуцијата, каде со едноминутен молк и громогласен аплауз им беше оддадена почит на загинатите и поддршка на семејствата кои упорно ја бараат вистината.
