Малата Делфина од видот гибони конечно си доби ново соодветно живеалиште во скопската Зоолошка градина.
Живеалиштето тимски го направиле вработените во Зоолошката. Тоа е направено според ЕАЗА-стандарди.
Од Зоолошката велат дека сега Делфина љубопитно го истражува својот нов дом, а во наредниот период ќе ѝ се приклучи и нејзиното помало братче, Мики.
Делфина, пред околу четири години, била отфрлена од мајката и спасена од давење во езерцето во ЗОО Скопје.
– Приказната за ова мало човеколико мајмунче стигна до сите светски медиуми, а нашиот тим и најмногу зоонегувателката Зера се грижеа за неа додека не порасна доволно за да живее самостојно – велат од Зоолошката градина. Од мајката било отфрлено и нападнато и нејзиното братче Мики.
– Гибоните се на листата на најзагрозени видови во светот, а ние, како тим, максимално и во иднина ќе се трудиме да имаат најдобра грижа – нагласуваат од Зоолошката градина.
