„Малешевијата на дланка“ и „Етноплоштад фестивал“

Со свечена церемонија и дефиле на културнo-уметничкитe друштва од Македонија, Бугарија и Србија вчеравечер во Берово беше отворено новото издание на „Етноплоштад фестивал“. Фестивалот и годинава се одржува во централното подрачје на Берово, на градскиот плоштад  „Димитар Беровски“.

Со говорот на градоначалникот на Општина Берово, Звонко Пекевски, за отворен беше прогласен и фестивалот, но и саемот на традиционалните малешевски производи „Малешевијата на дланка“.

– Овој фестивал претставува празник на нашата богата културна ризница. На народната песна, игра, народните обичаи и ракотворбите кои со генерации се пренесуваат и се негуваат во Берово и во Малешевијата. Тој е симбол на нашата традиција и на нашата гостопримливост кон сите оние што доаѓаат и ја почитуваат магијата на етнодухот – изјави Пекевски.

На првата фестивалска вечер со музички настапи се претставија културно-уметнички друштва од Малешевијата, но настап имаа и културно-уметнички друштва од Бугарија и Србија, а сите тие на најдобар начин ја претставија државата од која доаѓаат. Покрај културните уметнички друштва. музички настап имаше и еден од најпопуларните музичари од Македонија, Игор Димовски и неговата позната и надалеку призната „Пауза за ракија“, а веднаш по Игор Димовски и пауза за ракија, настап имаше диџеј Роби Реј.

– Покрај фестивалската програма, во рамки на настанот беше отворен и Саемот на традиционални производи „Малешевијата на дланка“, на кој, своите автентични производи ги презентираат занаетчии, земјоделци и мали бизниси од регионот. Посетителите имаат можност да уживаат во богатата понуда на домашни производи, ракотворби и гастрономски специјалитети што ги доловуваат убавината и специфичноста на Малешевијата – соопштија од Општина Берово.

Фестивалот, кој ќе трае неколку дена, ќе понуди концерти, настапи на културно-уметнички друштва, со цел промоција и зачувување на македонската традиција и културно наследство.

Берово во наредните денови ќе биде вистински центар на традицијата, музиката и на автентичните вкусови на регионот.