Македонската ревија „Стрип-креатор“ меѓу најдобрите на фестивал во Хрватска

Ревијата „Стрип-креатор“ бр. 38, издание на Македонскиот стрип-центар од Велес, а финансирано од Министерството за култура и туризам на Македонија, е едно од седумте списанија што ќе бидат претставени на годинашниот фестивал „Supertoon“ во Шибеник, Хрватска, каде што пристигнале 21 стрип-списание од разни држави од Европа и пошироко, по претходно објавен повик. Во потесната категорија се и изданијата: „OHOHOzine“, „Стрип-префикс“ и „Ирационалист“ од Хрватска, „Рас комик“ од Србија и „Винтарт“ и „Вирџина“ од Црна Гора.

Како што информира Томе Трајков, програмски координатор на Стрип-центарот, овој фестивал е специфичен бидејќи е насочен кон стрип-изданијата. Освен за категоријата стрип-списанија, беше објавен јавен повик и за стрип-книги и за стрип-фанзини. И овде конкурираа голем број пријавени изданија од разни земји.

И Трајков ќе присуствува на фестивалот, кој ќе се одржи од 21 до 25 јули и на кој ќе бидат прогласени најдобрите стрип-изданија. Трајков ќе организира панел-промоција за македонската стрип-сцена, а не помалку важни се и неформалните стрип-контакти со другите гости на фестивалот.

Како што наведува тој, со ова се отвора уште еден пат за меѓународна стрип-комуникација на македонските стрип-издавачи.