Во Кинотека на Македонија од 7 до 10 август ќе се одржи шестото издание на „Флипбук филм фестивал“, на кој ќе се прикажат 110 филма во главната, во студентската, во селекцијата на анимиран документарец, на анимирани музички видеа и европската панорама
Со специјална проекција и домашна премиера на филмот „Неми филмови“ на авторот Крсте Господиновски ќе се отвори шестото издание на „Флипбук филм фестивал“, што годинава ќе се одржи од 7 до 10 август во Кинотеката на Македонија. Краткометражниот анимиран филм на Господиновски, кој во јуни годинава имаше премиера на „Анеси“ во Франција и веќе освои и две награди на филмски фестивали, е приказна за едно мало кино сместено на залезот од немото време, кога една поранешна филмска ѕвезда, маскирајќи ја својата згасната слава, решава да проектира исклучиво неми филмови. Филмот е изработен во техниката куклена стоп-анимација и она што го прави исклучителен е фактот што целиот е изработен во еден непрекинат кадар. Сценариото го потпишуваат Господиновски, Жарко Иванов и Димитар Димоски, по чиј расказ е и инспириран филмот.
На годинашното издание на „Флипбук филм фестивал“ ќе се прикажат 110 филма во главната, во студентската, во селекцијата на анимиран документарец, на анимирани музички видеа и европската панорама.
Во неколку денови, публиката ќе може да види наградувани филмови од светските филмски фестивали од изминатата година, меѓу кои и филмот „Хурикан“ на чешкиот автор Јан Саска, добитник на награди на „Санденс“, Анеси, Мелбурн, Лондон, потоа „Вљубениот Кафка“ на Зане Оборенко, „Психонаути“ и „Како“ на хрватските автори Нико Радаш и Марко Мештровиќ, како и филмови од полска, шведска, белгиска, руска, грчка, француска продукција.
Во студентската селекција, пак, ќе има филмови од најдобрите европски школи за анимиран филм како наградуваните – германско-иранскиот „Крушова градина“ и француско-британскиот „Интермисија“. Ќе бидат прикажани и македонските „Изгубено-најдено“ на Диме Ѓорѓиевски и „Мајчин инстинкт“ на Ема Зафировска, а во селекцијата на анимирани музички видеа – „Еден ден“ на Ѓорѓе Јовановиќ и Александар Јосифовски и „Приспивна“ на Никола Радуловиќ.
Седум наслови, пак, ќе имаат проекција во категоријата анимиран-документарен филм, меѓу кои и наградуваниот „Саарвокадо“ на Виктор Ороско Рамирез, данскиот „Визуализација на пресек“ и францускиот „Мојот тинејџ блекаут“.
Во европската панорама ќе се прикажат вкупно 31 филм, од кои пет македонски: „Бла-бла“ на Кристина Даниловска, „Последната светулка“ на Димитар Аризанов, „Желба“ на Ирена Поповска, „Дневникот на заведениот“ на Сашко Илов и Цеци Темкова, „Рега га е“ на Ивица Сирановиќ и „17 часот“ на Фјака Коколи.
Во рамките на фестивалот се најавени и изложби и работилници за производство на анимиран филм и флип-бук, а ќе бидат промовирани и книгите „Калиграфи на филмското писмо“, на филмскиот критичар Влатко Галевски, издание на „Флипбук букс“, и книгата „Штрих и стих“, издание на познатиот во светот на анимираниот филм „Компот колектив“, чии основачи Весела Данчева и Иван Богданов се дел од фестивалското жири. Во жирито годинава членови ќе бидат и директорите на филмскиот фестивал „Анимест“ од Букурешт, Лиџа Соаре и Михаи Митрица, како и наградуваните српски автори на анимиран филм, Никола Мајдак и Ана Недељковиќ.
