Со измените на Законот за пензиско и инвалидско осигурување, мајките во Србија ќе имаат право на посебен стаж, што ќе им донесе повисока пензија. Од 2032 година посебен стаж ќе им се признае на мајките со едно или две деца, додека мајките со три или повеќе деца ќе можат веднаш да аплицираат.
– На мајките со едно или две деца ќе им се доделат шест месеци или една година посебен стаж, додека мајките со три или повеќе деца можат да го продолжат својот стаж за дури две години. Овој стаж не е услов за пензионирање, но се вклучува во вкупниот пензиски стаж и значително влијае на износот на пензијата. Практично, повисокиот коефициент се пресметува на крајот, што значи дека на жена со 30 години стаж ќе се смета дека работела 32 години, што ќе резултира со повисока пензија. За да го оствари мајката ова право, треба да поднесе барање до надлежната филијала на Фондот за пензиско и инвалидско осигурување – објави српски „Блиц“.
Србија го воведува овој систем по примерот на многу европски земји кои активно ја признаваат родителската работа во рамките на пензискиот систем. Во Германија од 2014 година на мајките на деца родени пред 1992 година им се доделуваат дополнителни години, што автоматски го зголемува износот на пензијата. Татковците, старателите и бабите и дедовците, исто така, имаат право на оваа пензија. Со најновите измени, од 2027 година, се проценува дека околу 10 милиони жени ќе имаат корист од надоместок од 20 евра месечно по дете. Слични поволности во пензионирањето на мајките има и во Австрија, Франција и Шведска.
