Во изминатите 25 години, Икер Касиљас беше еден од најдобрите голмани што ги видел светот на фудбалот. Како 18-годишник, тој се наоѓаше помеѓу стативите за Реал (М) и остана во клубот до 2015 година, кога шокантно го напушти „Сантијаго Бернабеу“, иако сè уште бранеше на врвно ниво.
Многумина тврдеа дека Икер бил непотребно понижен и исфрлен од клубот. Шпанецот заврши во Порто, каде што стави крај на кариерата во 2020 година поради проблеми со срцето.
Неговата мајка, Мари Кармен Фернандез, е огорчена од Реал (М) и Флорентино Перез. Таа тврди дека претседателот на „кралскиот клуб“ е злобна личност која направила сè за да го спречи нејзиниот син да ја заврши кариерата во Мадрид.
„Со сето должно почитување кон Куртоа, Икер е најдобриот голман во историјата на Реал (М). Сепак, тој заврши во Порто, кој е сè уште клуб од трето ниво“, рече Мари Кармен.
Мари Кармен го роди Икер во Мадрид, но и денес жали што не остана во Баскија, од каде што е таткото на Икер, бидејќи верува дека тим како Атлетик Билбао многу повеќе би се грижел за нејзиниот син.
„Решив да го родам во Мадрид бидејќи бев поблиску до моето семејство. Сега се каам“, вели таа и додава:
„Икер можеше целата кариера да ја помине во Атлетик и таму ќе се однесуваа кон него многу подобро отколку во Реал (М)“.
Таа исто така тврди дека Флорентино Перез никогаш не го сакал нејзиниот син.
„Флорентино никогаш не го сакал затоа што е низок за голман. Тој сака високи голмани. Беше опседнат со доведувањето на Буфон. Мојот Икер страдаше повеќе отколку што некој може да замисли, се справуваше со многу притисок и беше третиран поинаку во споредба со други ситуации. Беше навреден и тоа влијаеше емоционално на мојот син.“
„Тој ја крие својата тага внатре. Никогаш нема да ги сподели своите проблеми со другите, но ги чувствува. Го гледав како страда со години. Флорентино вадеше гадни работи од ракавот, се однесуваше ужасно кон него. Флорентино го исфрли од клубот.“
„Светскиот шампион не може да заврши во Порто. Тоа е сè уште тим од третата лига за калибарот на мојот син. Можеше да игра каде што сака, а мене не би ми пречело ако отидеше во Барселона, што е клуб за џентлмени.“
Икер Касиљас одигра 725 натпревари за Реал (М), освои апсолутно сè што можеше, исто како и со шпанската репрезентација, за која играше 167 пати.
ИЗДВОЕНИ
Градилиштата опасни за минувачите – оградите веднаш до улица, тротоар, па и паркинг
Ќе се повтори ли битолското сценарио и по поплавите, кои оставија под вода цели населби: Штетите во илјадници евра, обесштетувањата ситнеж
Владиниот авион натоварен со сомнежи, кој колку летал во облаци?!
Македонски пасош или европски трансфер: драма во Вардар поради Хориха
