Откако американскиот претседател Доналд Трамп оваа недела објави дека САД „многу наскоро“ ќе започнат копнени операции против мрежите за трговија со дрога во Венецуела, политичките тензии меѓу Вашингтон и Каракас се продлабочија.
Трамп во саботата изјави дека воздушниот простор над и околу Венецуела ќе биде „целосно затворен“, наведувајќи дека ова е нова мерка како дел од зголемениот притисок врз владата на венецуелскиот претседател Николас Мадуро, објави Ројтерс.
Според агенцијата, САД со месеци вршат воздушни и поморски напади врз бродови за кои постои сомневање дека транспортираат дрога преку Карибите и Пацификот, додека паралелно се зголеми присуството на американски воени единици во регионот.
Ројтерс, исто така, објави дека претседателот Трамп одобрил тајни операции на ЦИА во Венецуела.
Од друга страна, Николас Мадуро ги отфрла обвинувањата дека раководи со „нарко-држава“ и тврди дека Венецуела е подготвена да се одбрани.
Според него, повеќе од осум милиони граѓани наводно се приклучиле на „националниот одбранбен систем“ откако Каракас ги повика сите способни мажи да се подготват за можна инвазија на САД.
Мадуро изјави дека повеќе од четири и пол милиони луѓе веќе добиле воена обука во последните години и се „подготвени за војна“.
Сепак, според извори на Ројтерс запознаени со реалните воени капацитети на земјата, силите на Венецуела бројат околу 300.000 и се соочуваат со хронични проблеми како што се недостаток на опрема, лоша обука и ниски плати.
Еден извор рече дека одговорот на мобилизацијата на Мадуро веројатно ќе се мери во „илјадници, а не милиони“.
