Лекарот кој му обезбеди кетамин на Метју Пери е осуден на две и пол години затвор

Лекарот на американскиот актер Метју Пери, кој почина од предозирање со дрога во 2023 година, е осуден на две и пол години затвор за нелегално снабдување на актерот со анестетици, објавија денес американските медиуми.

Ѕвездата на серијата „Пријатели“, Метју Пери, се предозира со кетамин, моќен седатив што му го препишал д-р Салвадор Пласенсија, објави „Ројтерс“.

Д-р Пласенсија, кој водел клиника за итна медицинска помош во областа на Лос Анџелес, се изјасни за виновен пред федералниот суд во јули по четири точки од обвинението за нелегална дистрибуција на анестетици на рецепт.

Доколку се изјаснеше за невин и судењето продолжеше, Пласенсија можеше да биде осуден на максимум 40 години затвор.

Пери почина на 54-годишна возраст откако со години се бореше со зависност, која датира од времето кога беше една од најголемите ѕвезди на неговата генерација за улогата на Чендлер Бинг.

Актерот легално го земал хируршкиот анестетик кетамин како третман за депресија, но кога неговиот лекар не му ја дал количината што ја сакал, тој се обратил до Пласенсија, кој призна дека нелегално му го продал на Пери и знаел дека Пери е зависник.

Пласенсија е првиот од петмината обвинети кои се изјасниле за виновни во врска со смртта на Пери, а судењата за другите четворица ќе се одржат во наредните месеци, објавува „Танјуг“.