Легендарниот холивудски режисер Роб Рајнер и неговата сопруга пронајдени мртви: Полицијата испрашува член на семејството

Легендарниот холивудски режисер и актер Роб Рајнер и неговата сопруга Мишел беа пронајдени мртви во нивниот дом во Лос Анџелес, а властите го истражуваат инцидентот како убиство, објавија американските медиуми денеска, додавајќи дека полицијата испрашува член на семејството.

Рајнер (78), легендарен актер, режисер, а подоцна и политички активист, и неговата сопруга, фотографка и продуцентка, беа пронајдени мртви во неделата. Полициски извор изјави за „Тајмс“ дека член на семејството е испрашуван во врска со нивната смрт. Извор кој не бил овластен да зборува со медиумите за истрагата, но бил информиран за неа, потврдил дека нема знаци на насилно влегување во нивниот дом. Тој исто така рекол дека Рајнерови имале длабоки убодни рани.

На прес-конференција доцна во неделата, заменик-шефот на полицијата во Лос Анџелес, Алан Хамилтон, даде многу малку информации за случајот, но рече дека е отворена истрага за смртните случаи.

Тој рече дека детективите работат на обезбедување налог за претрес пред да започнат „темелна“ истрага во и надвор од домот.

„Во овој момент, полициската управа на Лос Анџелес не бара никого како осомничен или лице од интерес… и нема да го сториме тоа сè додека не ја спроведеме нашата истрага и не продолжиме понатаму“, рече Хамилтон. Тој рече дека ќе бидат испрашувани повеќе членови на семејството, но дека „никој не е во притвор; никој не е испрашуван како осомничен“.

Рајнер е познат по режирањето филмови во различни жанрови, вклучувајќи ги „Неколку добри луѓе“, „Кога Хари ја запозна Сали“ и „Стој покрај мене“.

Тој беше номиниран за Оскар во 1992 година за „Неколку добри луѓе“ во кои глумат Џек Николсон и Том Круз, но загуби од Клинт Иствуд и неговиот вестерн „Недопирливите“.

Рајнер беше и истакнат политички глас во Холивуд.

Тој е ко-основач на Американската фондација за еднакви права, која ја водеше борбата за истополови бракови. Тој е исто така активен во прашањата за заштита на децата со години.