Еден од најдобрите кошаркари во НБА-лигата, Леброн Џејмс, навести дека ќе следува важна објава, па многумина мислеа дека станува збор за одлуката од 2010 година, кога објави дека се сели во Мајами. Но тогаш, всушност, стануваше збор за реклама за марка пијалаци.
Објавата требаше да излезе напладне во источната временска зона, односно во 18:00 часот по средноевропско време, но „хенеси“, марка коњак, ја објави порано, бидејќи се променија обврските и датумите за тренинзи на Џејмс.
– Оваа есен ќе го доведам мојот талент во хенеси V.S.O.P. – вели Џејмс во видеоклипот.
Кошаркарот на Лос Анџелес лејкерс изјави во понеделникот дека ќе објави за „одлуката на сите одлуки“, па многумина шпекулираа дека ќе ја соопшти за завршување на кариерата.
Во рекламата, тој дури ги употребува зборовите што ги укажа пред 15 години, кога објави дека ќе се пресели во Мајами.
Американскиот кошаркар ја продолжи соработката со оваа марка, која издаде портокалово шише во ограничено издание со неговото име и со неговиот препознатлив гест за круна, алузија на неговиот прекар Крал Џејмс.
Џејмс ќе наполни 41 година во декември. Тој е најстариот играч во НБА во моментов и се подготвува за рекордната 23. сезона во неа.
На крајот од сезоната, неговиот договор со клубот од Лос Анџелес истекува. Минатата сезона, тој стана првиот играч во историјата на лигата што постигнал 50.000 поени во регуларната сезона и во плејофот.
Откако беше драфтуван од својот клуб Кливленд во 2003 година, играше за Мајами и за Лејкерс. Беше шампион со Мајами во 2012 и во 2013 година, со Кливленд во 2016 година и со Лејкерс во 2020 година.
Тој е водечки стрелец во лигата со 42.184 поени, пред Карим Абдул-Џабар (38.387) и Карл Малоун (36.928) и е втор на листата на сите времиња со 1.562 одиграни натпревари. Прв е Роберт Париш, кој одигра 1.611 натпревари во 21 сезона.
Во април, тој стана првиот професионален машки спортист според кого е моделирана познатата кукла Кен од компанијата „Мател“, која произведува Барби.
– Ми се допаѓа мојата одлука – вели Џејмс на крајот од рекламата.
