Лавров ги повикува САД да ја прекинат поморската блокада на Куба

Рускиот министер за надворешни работи Сергеј Лавров денес ги повика САД да „покажат здрав разум“ и одговорен пристап и да ги напуштат плановите за поморска блокада на Куба.

На средбата со кубанскиот министер за надворешни работи Бруно Родригез Париља во Москва, тој рече дека Русија доследно ќе продолжи да ја поддржува Хавана во заштитата на нејзиниот суверенитет и безбедност. Лавров ги осуди нелегитимните санкции на Вашингтон како притисок врз кубанската држава и ги нарече изјавите за руско-кубанските односи неприфатливи.

„Руската страна остро ги осуди нелегитимните рестриктивни мерки на Вашингтон против Хавана и економскиот и воениот притисок врз кубанската држава и нејзините граѓани… Москва категорично ги отфрла неоснованите обвинувања за соработка меѓу Русија и Куба, како наводни закани за САД или други земји“, нагласи Лавров, пренесува ТАСС.

Париља рече дека Куба ќе продолжи „решително да се движи напред во заштитата на својата независност и суверенитет“, да го одржи својот курс и да бара ефикасни решенија за економијата.

„Куба е загрижена поради влошувањето на меѓународната ситуација и постапките на Соединетите Американски Држави, кои претставуваат закана за суверенитетот на сите земји“, изјави шефот на кубанската дипломатија, пренесува „Танјуг“.

Според него, Куба е посветена на заеднички проекти и договори со Москва, и покрај сите тешкотии.

„Куба секогаш ќе биде подготвена за почитување и дијалог под рамноправни услови со која било земја“, рече Париља.

За време на состанокот, рускиот и кубанскиот министер за надворешни работи ја потврдија својата посветеност на зајакнување на стратешкото партнерство во сите области и ја нагласија неприфатливоста на воведувањето рестриктивни мерки врз Куба во енергетскиот сектор.

САД неодамна ги запреа испораките на венецуелска нафта во Куба и се заканија со санкции против земјите што продаваат нафта во Хавана. Русија вети дека ќе испраќа нафта во Куба, но не прецизираше кога или во какви количини.