Ландо Норис: Не ми е грижа што сум светски шампион

Ландо Норис зазеде многу јасен и цврст став откако го освои својот прв светски шампионат во Формула 1 во Абу Даби. Возачот на Мекларен изјави дека победата над Макс Верстапен на трката за титулата не е извор на лична среќа за него, ниту, пак, е нешто за кое размислува на начинот на кој често го претставува јавноста.

Тој ја заврши сезоната како шампион по драматичната завршница на последната трка во Абу Даби, на која го освои третото место, доволно за да ја задржи предноста од два бода пред Верстапен.

И покрај сè, новиот светски шампион вели дека не е заинтересиран за дискусиите за тоа кој е подобар возач. Нагласи дека не му е важно што го симнал од тронот четирикратниот светски шампион, ниту што ја освоил титулата во исклучително тесна битка. Овој став се однесува и на неговиот однос со тимскиот колега Оскар Пјастри, со кого водеше исцрпувачка внатрешна битка во Мекларен, во текот на целата сезона.

На крајот, Норис излезе како победник и во тој дуел, завршувајќи ја сезоната со 13 бода пред Пјастри. Сепак, ова не е причина тој да се фали или да докажува нешто.

• Мојата мотивација не е да докажам дека сум подобар од кој било друг. Тоа не е она што ме прави среќен. Нема да се разбудам утре и да кажам: „Толку сум среќен затоа што го победив Макс. Навистина, длабоко во себе, не ми е грижа за тоа. Не ми е грижа дали секоја реплика ќе биде: „Дали мислиш дека е подобар од тебе?“ или „Оскар е подобар“ или што и да е. Не е важно. Немам никаков интерес за тоа – истакна Норис.

Зборувајќи за тоа што навистина го исполнува, тој ги издвои луѓето што биле тука за него во текот на целиот негов пат до титулата.

• Направив што морав за да го освојам светското првенство. Тоа е тоа. И ги направив моите луѓе среќни. Тоа е сè што ме интересира навистина на крајот од денот. Нема да се разбудам среќен само затоа што можам да си кажам: „Јас сум светски шампион“. Можеби ќе ме насмее, но нема да биде вистина. Вистината ќе биде: „Мајка ми е среќна. Татко ми е среќен. Сестрите ми се среќни. Брат ми е среќен. Пријателите ми се среќни“. И тоа е сè што ми треба во животот – додаде Норис.

Во светот на Формула 1, каде што егото често оди рака под рака со успехот, Ландо Норис покажа со оваа изјава дека титулата не мора нужно да ја промени личноста. Можеби, не го интересира дали е подобар од Макс Верстапен, но едно е сигурно: неговиот поглед на успехот веќе го издвојува од многумина пред него.