Култниот стадион замина во историја

Во последниве години, клубовите сè повеќе одлучуваат да ги градат своите стадиони од нула, бидејќи реновирањето на постојните не е навистина профитабилно на долг рок.

Затоа има сè повеќе нови и модерни стадиони низ Европа, што е секако за пофалба, но за жал, поради ваквите одлуки, некои од иконските стадиони во светот на фудбалот мораа да бидат срушени.

Таква судбина ја снајде и „Ла Ромареда“, која е дом на Сарагоса, а иконскиот стадион на шпанскиот клуб официјално замина во историјата.

„Ла Ромареда“ ќе биде еден од домаќините на Светското првенство во 2030 година, поради што беше одлучено стадионот целосно да се сруши, а на истото место ќе се изгради модерна арена со многу поголем капацитет.

Стадионот на Сарагоса беше домаќин и на Светското првенство во 1982 година, а во претходните децении беа планирани неколку реновирања на „Ла Ромареда“, но на крајот ништо не произлезе од тоа.

Челниците на клубот и властите во Сарагоса одлучија дека е најдобро целосно да се сруши „Ла Ромареда“, што баш не ги возбуди навивачите на овој тим, но кога сфатија каков стадион ќе добијат, се помирија со таков исход.

Рушењето на „Ла Ромареда“ започна пред неколку месеци, а официјално беше завршено со рушење на рефлекторите.

Исто така, на социјалните мрежи се појави видео на кое се гледа како денес изгледа местото каде што некогаш се наоѓал иконскиот стадион, а е целосно срамнето со земја.

Фазата на рушење и чистење на теренот е завршена, а официјалната изградба на новиот стадион на Сарагоса ќе започне наскоро. Патем, „Ла Ромареда“ имаше капацитет од речиси 34.000 седишта, а новиот стадион ќе има капацитет од 43.000 седишта.

Шпанските медиуми објавија дека трошоците за изградба на новиот стадион на Сарагоса ќе бидат околу 140 милиони евра, а планот е да се заврши во следните две години.

Покрај натпреварите од Светското првенство во 2030 година, се очекува и шпанската репрезентација да ги игра повеќето од своите натпревари во Сарагоса во иднина.